Employment

ໃນໄລຍະຜ່ານມາ ພວກຂ້າພະເຈົ້າ ໄດ້ເປັນຜູ້ຕາງໜ້າທາງດ້ານກົດໝາຍ (ທະນາຍຄວາມ) ໃຫ້ແກ່ຜູ້ໃຊ້ແຮງງານ ໃນຫລາຍໆຄະດີ ແລະ ໄດ້ຮັບຜົນຂອງການຕັດສິນຂອງສານ ທີ່ເປັນບວກໃຫ້ແກ່ ບໍລິສັດ ຫລື ອົງການຈັດຕັ້ງນັ້ນ ຈົນຫລາຍຄັ້ງ ພວກຂ້າພະເຈົ້າ ຖືກຕັ້້ງຄຳຖາມກ່ຽວກັບການປະຕິບັດ ແລະ ຈຸດຢືນ ຂອງກົດໝາຍວ່າດ້ວຍແຮງງານ ວ່າ ເປັນກາງ ຫລື ຕ້ອງການປົກປ້ອງຝ່າຍໃດໜຶ່ງ?

ສປປ ລາວ ໄດ້ປັບປຸງກົດໝາຍວ່າດ້ວຍແຮງງານ ຄັ້ງຫລ້າສຸດໃນປີ 2013 ແລະ ມີການນຳໃຊ້ມາຈົນເຖິງປັດຈຸບັນນີ້, ກົດໝາຍວ່າດ້ວຍແຮງງານ ປີ 2013 ໄດ້ຮັບການປັບປຸງມາຈາກກົດໝາຍວ່າດ້ວຍແຮງງານ ປີ 2006 ເນື່ອງຈາກເຫັນວ່າ ກົດລະບຽບ ແລະ ຫລັກການຕ່າງໆທີ່ກຳນົດໃນສະບັບປີ 2006 ນັ້ນ ຍັງບໍ່ແທດເໝາະກັບສະພາບການປ່ຽນແປງໃໝ່ທາງດ້ານເສດຖະກິດ ແລະ ສັງຄົມຂອງລາວ.

ກົດໝາຍສະບັບນີ້ ນຳໃຊ້ກັບ ຜູ້ໃຊ້ແຮງງານ, ຜູ້ອອກແຮງງານໃນລະບົບ ແລະ ນອກລະບົບ, ຜູ້ອອກແຮງງານຄົນລາວ ທີ່ເຮັດວຽກນຳອົງການຕ່າງປະເທດ ລວມທັງ ຜູ້ອອກແຮງງານຕ່າງປະເທດທີ່ເຮັດວຽກ ຢູ່ ດິນແດນຂອງ ສປປ ລາວ.

ກົດໝາຍວ່າດ້ວຍແຮງງານ ສະບັບປັບປຸງນີ້ ໄດ້ບັນຍັດລະອຽດ ແລະ ຈະແຈ້ງກ່ຽວກັບ ສັນຍາແຮງງານ, ການຍົກເລີກສັນຍາແຮງງານ, ການຈ່າຍເງິນຊົດເຊີຍແຮງງານ. ສ່ວນບັນຫາ ຫລື ຂໍ້ຂັດແຍ່ງ ທີ່ມັກເກີດຂຶ້ນລະຫວ່າງ ຝ່າຍຜູ້ໃຊ້ແຮງງານ ກັບ ຜູ້ອອກແຮງງານ ບໍ່ວ່າ ຈະເປັນຄົນລາວ ຫລື ຕ່າງປະເທດກໍຕາມ ນັ້ນ ແມ່ນ ການຍົກເລີກສັນຍາແຮງງານ ແລະ ການຮຽກຮ້ອງການຊົດເຊີຍແຮງງານ.

ການຍົກເລີກສັນຍາແຮງງານ ແລະ ສິດການຮຽກຮ້ອງເງິນຊົດເຊີຍແຮງງານ ນັ້ນ ແມ່ນຖືກກຳນົດຂ້ອນຂ້າງລະອຽດ ແລະ ຈະແຈ້ງແລ້ວໃນກົດໝາຍວ່າດ້ວຍແຮງງານສະບັບປັບປຸງ ປີ 2013 ໃນມາດຕາ 80, 82, 83, 86, 87, 88, 89 ແລະ 90.

ສັນຍາແຮງງານ ແມ່ນ ຕົກລົງກັນລະຫວ່າງ ຜູ້ໃຊ້ແຮງງານ ແລະ ຜູ້ອອກແຮງງານ ບົນພື້ນຖານຫລັກການທີ່ທັງສອງຝ່າຍ ມີ ຄວາມສະໝັກໃນ, ຄວາມສະເໝີພາບກັນ, ເຈດຕະນາດີ-ບໍລິສຸດໃຈ, ເຄົາລົບລະບຽບກົດໝາຍ-ຮີດຄອງປະເພນີ ແລະ ຕ້ອງຮັບຜິດຊອບຕໍ່ຄວາມເສຍຫາຍທາງແພ່ງ ຖ້າຝ້າຍໃດຫາກໄດ້ມີການລະເມີດ.

ສະນັ້ນ ຈຶ່ງເຫັນວ່າ ກົດໝາຍວ່າດ້ວຍແຮງງານສະບັບປັບປຸງນີ້ ລວມທັງກົດໝາຍສະບັບອື່ນໆທີ່ກ່ຽວຂ້ອງ ແມ່ນ ໄດ້ກຳນົດ ແລະ ໃຫ້ສິດ ແລະ ພັນທະ ແກ່ທັງສອງຝ່າຍ ຜູ້ໃຊ້ແຮງງານ ແລະ ຜູ້ອອກແຮງງານ ຢ່າງສະເໝີພາບກັນຕໍ່ໜ້າກົດໝາຍ.

ກົດໝາຍ ຈະປົກປ້ອງສິດຂອງຜູ້ອອກແຮງງານ ຖ້າມີກໍລະນີທີ່ ຜູ້ໃຊ້ແຮງງານ ຫາກໄດ້ລະເມີດລະບຽບກ່ຽວກັບການຄຸ້ມຄອງແຮງງານ, ສະຫວັດດີການ ແລະ ນະໂຍບາຍອື່ນໆຂອງຜູ້ອອກແຮງງານ. ໃນຂະນະດຽວກັນ ຜູ້ອອກແຮງງານເອງ ກໍສາມາດຖືກຍົກເລີກສັນຍາແຮງງານໄດ້ ໂດຍຜູ້ໃຊ້ແຮງງານ ແລະ ບໍ່ມີພັນທະໃນການຈ່າຍເງິນຊົດເຊີຍແຮງງານ ໃຫ້ແກ່ຜູ້ອອກແຮງງານ ຖ້າຫາກເຫັນວ່າ ຜູ້ອອກແຮງງານມີຄວາມຜິດ ຕາມຫລັກການທີ່ໄດ້ກຳນົດໄວ້ໃນມາດຕາ 86 ຂອງກົດໝາຍວ່າດ້ວຍແຮງງານ ສະບັບປັບປຸງ 2013.

ດັ່ງນັ້ນ ບັນຫາ ຫລື ຂໍ້ຂັດແຍ່ງກ່ຽວກັບແຮງງານທີ່ເກີດຂຶ້ນລະຫວ່າງ ຝ່າຍໃຊ້ແຮງງານ ກັບ ຜູ້ອອກແຮງງານ ນັ້ນ ຕ້ອງເບິ່ງໃນລາຍລະອຽດວ່າ ການລະເມີດເກີດຂຶ້ນຈາກຝ່າຍໃດ? ການຍົກເລີກສັນຍາແຮງງານນັ້ນ ເຂົ້າກັບເງື່ອນໄຂການໄດ້ຮັບເງິນຊົດເຊີຍແຮງງານ ຫລື ບໍ່? ຊຶ່ງເປັນຫລັກການສາກົນທາງດ້ານກົດໝາຍ ແລະ ເປັນທຳລະຫວ່າງສອງຝ່າຍ ຊຶ່ງແຕ່ລະຝ່າຍ ມີສິດ ແລະ ພັນທະ ຕ້ອງເຄົາລົບ ແລະ ປະຕິບັດຕາມເນື້ອໃນ ແລະ ເງື່ອນໄຂຂອງສັນຍາແຮງງານ ແລະ ລະບຽບກົດໝາຍຂອງ ສປປ ລາວ.